Mae Diwrnod Shwmae Sumae yn ddiwrnod blynyddol ar 15fed o Hydref sy’n ysgogi pobl i ddechrau bob sgwrs yn y Gymraeg boed hynny mewn caffi, wrth dorri eich gwallt, yn yr archfarchnad - yn unrhyw le! Rydyn ni yn Undeb Myfyrwyr Prifysgol Caerdydd yn falch iawn o’r Gymraeg â’n myfyrwyr Cymraeg. Edrychwch isod am beth sydd i’w gynnig i fyfyrwyr Cymraeg a dysgwyr.

Diwrnod Shwmae Su’ mae Hapus!

Mae'r Gymraeg yn rhan allweddol a phwysig o fywyd bob dydd yn y Brifddinas ac yn ogystal â chlywed y Gymraeg o amgylch y campws a’r ddinas, mae llwyth o gyfleuoedd i fyfyrwyr gael cymdeithasu drwy gyfrwng y Gymraeg.

Cymdeithasau Cymraeg Undeb y Myfyrwyr

Y Gym Gym

Y Gym Gym yw Cymdeithas Gymraeg mwyaf Prifysgol Caerdydd, a gyda bron i 200 o aelodau, mae’n un o gymdeithasau mwyaf bywiog y Brifysgol. Mae cymryd rhan yng ngweithgareddau’r Gym Gym yn ffordd wych ichi ddod i adnabod siaradwyr Cymraeg eraill y Brifysgol, ac mae’n eich galluogi i fyw a bod drwy gyfrwng y Gymraeg yng Nghaerdydd.
Dilynwch eu cyfrifon ar trydar a facebook.

Ymaelodi â'r Gym Gym

Clwb y Mynydd Bychan

Cymdeithas Cymraeg myfyrwyr meddygaeth a gofal iechyd Caerdydd yw Clwb y Mynydd Bychan. Mae’r gymdeithas yn rhoi’r cyfle i fyfyrwyr gofal iechyd gymryd rhan mewn gweithgareddau cymdeithasol ac allgyrsiol drwy gyfrwng y Gymraeg.
Dilynwch eu cyfrifon ar trydar a facebook.

Ymaelodi â Chlwb y Mynydd Bychan

Y Waun Ddyfal

Os yw’r celfyddydau a pherfformio yn mynd â’ch bryd, yna dylech ymuno ag Aelwyd y Waun Ddyfal. Mae ymuno â’r côr yn eich galluogi i gymryd rhan mewn côr llwyddiannus o safon uchel, yn ogystal â rhoi’r cyfle i chi gwrdd â siaradwyr Cymraeg o ledled Cymru.
Dilynwch eu cyfrifon ar trydar a facebook.

Cysylltwch â Chôr y Waun Ddyfal ar facebook er mwyn gwybod mwy am ymaelodi.

Eich Hawliau

Fel myfyrwyr Cymraeg yng Nghaerdydd, mae gennych nifer o hawliau i ddefnyddio’ch Cymraeg o ddydd i ddydd o fewn y Brifysgol ac Undeb y Myfyrwyr. Os ydych chi’n cael unrhyw drafferthion gyda derbyn yr hawliau isod, neu os nad ydych yn teimlo bod eich hawliau wedi cael eu cynnig a’i hysbysebu i chi, cysylltwch â Swyddog y Gymraeg, Owain Beynon.

Cysylltu â Swyddog y Gymraeg

Eich hawliau o fewn y Brifysgol

O ganlyniad i Safonau’r Gymraeg sydd wedi eu gosod ar y Brifysgol gan Lywodraeth Cymru, mae gennych nifer o hawliau i ddefnyddio’ch Cymraeg o fewn y Brifysgol. Mae’r hawliau hyn yn cynnwys:

• Yr hawl i gyflwyno unrhyw draethawd neu arholiad drwy gyfrwng y Gymraeg.
• Yr hawl i gael tiwtor personol sy’n medru’r Gymraeg.
• Yr hawl i gael mynediad i fewnrwyd cyfrwng Cymraeg.
• Yr hawl i gyfathrebu yn uniaith Gymraeg gyda’r Brifysgol.
• Yr hawl i fynegi dymuniad am lety penodedig Cymraeg.

Dysgu mwy am eich hawliau

Eich hawliau o fewn yr Undeb

• Yr hawl i gyfathrebu’n uniaith Gymraeg gydag unrhyw aelod o staff neu swyddog etholedig
• Yr hawl gyfrannu’n Gymraeg mewn unrhyw gyfarfod democrataidd
• Yr hawl i dderbyn gwybodaeth gan yr Undeb yn Gymraeg dros e-bost neu dros y cyfryngau cymdeithasol.
• Yr hawl i lenwi ffurflenni a holiaduron yn Gymraeg.